 |
Uviéu ye capital del Reinu d'Asturies dende l'añu 794 cuando'l rei Alfonsu II traila dende Cangues d'Onís y fai de la nueva capital una digna sé real entamando la construcción d'una nueva catedral consagrada al Salvador y a los Apóstoles. El rei Fruela I, yá fixera n'Uviéu un templu y palaciu real onde nel añu 759 naciera'l so fíu, Alfonsu II. Nel añu 808 Alfonsu II dona a la Catedral la Cruz de los Ánxeles, símbolu d'Uviéu, y entama facer más edificios como'l Panteón Real de la ilesia de Santa María, San Tirsu, la Cámara Santa del Palaciu Real, un acueductu y una primer muria circular y defensiva qu'arrodiaba la ciudá entera. El rei Alfonsu III el Grande edifica un nuevu palaciu real na plaza la catedral, nueves ilesies como Santuyanu y fontes como la Foncalada, enancha'l Reinu d'Asturies hasta los ríos Dueru y Nervión y xunto cola reina Ximena dona a la catedral la Cruz de la Victoria de Pelayu cubierta d'oru y piedres que dende entós ye la seña y bandera d'Asturies. Alfonsu III agranda la vieya muria d'Uviéu d'Alfonsu II y edifica un castiellu defensivu que daba a l'actual Plaza Porlier y que per sieglos foi cárcele. Los oríxenes d'Uviéu hai que los buscar nel añu 761 cuando unos monxos benedictinos, Máximu y Fromestanu, entamen la fundación d'un templu n'honor a San Vicente que llueu foi conventu. Nel claustru d'esti conventu, na actual cai San Vicente ye onde s'atoparon los restos de la primer muria d'Uviéu fecha por Alfonsu II nel sieglu octavu y una gran fastera d'esta primer muria inda ye güeyable na cai Xovellanos yá que la propia muria sirvió de sofitu pa construír el monasteriu de San Pelayu. Dende'l sieglu X la ciudá aparez perfectamente estructurada dientro de les muries y la disposición interna de les cais ye prácticamente la que tien güei. Una de les puertes principales d'entrada a la ciudá dende Castiella yera la puerta allugada no que güei ye l'arcu del ayuntamientu pela cai Cimavilla. Los cachos de la muria d'Uviéu qu'indagüei se conserven, el mayor y más grande d'ellos ye'l de la cai Paradisu, daten del sieglu XIII cuando se fizo n'Uviéu una nueva y mayor muria arrodiando a so vez a l'anterior muria d'Alfonsu III el Grande. CAI PARAISO: Muria d'Uviéu sieglu XIII - Fábrica del Gas
|
 |
